Blumington şäherinde (ABŞ) ýerleşýän Indian uniwersitetiniň we Týanžin şäherinde ýerleşýän (Hytaý) Nankai uniwersitetiniň kiberhowpsuzlyk boýunça gözlegçiler topary IoT-enjamlaryna rugsat bermek bilen baglanyşykly howpsuzlyk ýalňyşlyklary ýüze çykardy.

IoT-önümlerine rugsat bermek prosesi köplenç bulutlar arkaly amala aşyrylýar, bu bulutlar enjam hödürleýänler (Philips Hue, LIFX we Tuya) ýa-da bulut bilen üpjün edýänler (Google we Amazon) tarapyndan dolandyrylýar. Bulutlar ulanyjylara «akylly» gulplary açmak üçin rugsat bermek bilen belli bir enjamlara girmek rugsadyny dolandyrýarlar.

Gözlegçileri birnäçe bulutlar bilen ulanyjylaryň arasynda IoT-önümlerine ygtyýarlyk bermek mümkinçiligi gyzyklandyrdy. Käbir öndürijiler Google Home üçin enjamlara rugsat bermek mümkinçiligi öz bulutlarynda üpjün edýärler. Meseleler bir bulut başga bir buludyň howpsuzlyk amallaryny bozanda ýüze çykýarlar. Bu ýagdaýlarda, enjamlar ulanyjynyň islegini ýerine ýetirmek bilen ygtyýarlygy doly aýyryp bilmeýärler. Mesele öndürijileriň protokollarynda saklanýar. Her bir öndüriji şahsy ygtyýar berme protokolyny howpsuzlyk baradaky näbelli çaklamalary bilen özbaşdak döredýär, emma dürli öndürijileriň protkollary bilelikde işlemek zerur bolýar.

«Protokollar bilelikde işlänlerinde, howpsuzlyk baradaky çaklamalary biri-biri bilen gabat gelmän biler we bir öndüriji başga bir öndürijiniň howpsuzlyk nukdaýnazardan ýerine ýetirýän işleriniň netijelerini ýa-da çaklamalaryny doly düşünip bilmeýär», - diýip bilermenler beýan etdiler.

Meseleleriň biri wagtlaýyn rugsatlar aýrylandan soňra enjama girmek rugsadyny uzaltmak mümkinçiligini berýär. Mysal üçin, öý eýesi myhman üçin jaýyň «akylly» gulpuna girmek rugsadyny wagtlaýyn berýär, emma myhman gitmeginden soňra (ýagny rugsady aýrylandan soňra) hem bu gulpy açyp biler.

Bilermenler bäş sany howply meseleleri ýüze çykardylar, olaryň ulanylmagy IoT-enjamlaryna rugsatsyz girmek mümkinçiligini berýärler.

Gözlegçileriň bellemegine görä, öndürijileriň arasynda ygtyýar berme mümkinçiligi ulanyjylar üçin peýdaly bolmagyna garamazdan, bu mehanizmiň düýbünde durýan protokollar has seresaply işlenip düzülmelidir. Gözlegçiler öndürijilere ähli tapylan meseleler barada habar berdiler.

Çeşme: securitylab.ru